Torpağın qara canına mənim boyda oyuq düşür.

44 Baxış

xeyaleselviAprelin 20-si Azərbaycan Yazıçılar Birliyinin Natəvan klubunda Xəyalə Selvinin “Saçlarıma ay qonub” adlı şeirlər kitabının təqdimat mərasimi keçiriləcək. Senet.az Xəyalə Selvinin kitabda yer alan şeirlərindən bir neçəsini təqdim edir:

 

İllər sonrakı görüş

 

Nə yaman gec qayıtmısan?

Səni elə gözləyirdim.

Deyirdilər dönməyəcək,

Bilə – bilə gözləyirdim.

 

Eh, soruşma ürəyimi,

Yadın olub, yadın olub.

O qızcığaz da böyüyüb,

Qadın olub, qadın olub.

 

Daha sənə aldanmağa

Böyüyübdü, ağlı qoymaz.

Dayanma yolum üstündə,

Qızı qoysa, oğlu qoymaz.

 

Baxma səni görən kimi

Gözlərimi yaşlamışam.

Deyirsən: “bağışla məni”

Mən çoxdan bağışlamışam.

 

O illərin arxasınca

Ayım gedir, ilim gedir.

Bu gün bizim toyumuzdu,

Göz yaşlarım gəlin gedir…

 

 

Pəncərədən boylanıram

 

Pəncərədən boylanıram,

Ay güzgümdə aylanıram.

Yer üzü qadın qapısı,

Gecə yarı döymək olmur.

 

Göy üzü yadın qapısı,

Dəymək olmur,

Dəymək olmur…

Həmin yol, həmin küçədi,

 

Qarayanız bir gecədi.

Bu azalan adamların arasında

Bir sən yoxsan,

Bir mən yoxam.

 

İki oldu bu yoxluq.

Böyüdü, boyumdan da

Yekə oldu bu yoxluq.

Heç kim ilə bölünməyən

 

Tikə oldu bu yoxluq.

Ömrümdən sənsiz illərim

Meyvə kimi dəyib düşür,

Gözlərimi döyüb düşür.

Və beləcə…

Və beləcə

Ölüm məndən duyuq düşür.

Torpağın qara canına

Mənim boyda oyuq düşür.

 

 

Bölmə : Bölməsiz, Poeziya
KÖŞƏ YAZARLARI
TOP 10