Vidadi İsmail: “Yer də qarpız şəklindədi, həqiqət budu…”

56 Baxış

vidadiSenet.az “XAN” nəşriyyatında çapdan çıxmış Əməkdar artist Vidadi İsmail Həsənovun  “Qum dənələri” adlı şeirlər kitabından seçmələri təqdim edir.

 

 

…    Əynimdə

gerçəkliyin  nimdaş  köynəyi,

ayağımda

zamanın  yırtıq  başmaqları,

başımda

göy  qübbəsi –

yol  gedirəm

içimdəki  səhrada,

nə kölgəm var,

nə də ayaq izlərim…

 

…    Ümüdümü

son damla su kimi içdim,

qanıma batırıb

yedim imanımı mənzil başında,

qadınımın dualarına

bürünüb uyudum –

qeyb oldum

üfüqdəki  ilğımda,

nə qəbrim var,

nə  də  baş  daşım…

…    Bu şəhərə

bir də qayıtsam,

bax elə

bu  tindəcə  oturub

alma  yeyə-yeyə

tum satacam uşaqlara –

bu   dünyaya

bir də gəlsəm,

nə şeir yazacam,

nə  qum  dənəsi  sayacam,

nə  də bu adam olacam…

 

hesenli***

 

…    Yumursan

yığılır,

yığırsan  sıxılır,

vurursan

vurulur,

çıxırsan

çıxılır,

bağlayırsan

açılır,

açırsan

uzanır,

uzadırsan

bir az da uzanır,

bir az da

uzatsan –

olur  uzunçuluq…

 

***

 

…    Mən oxumuş  adamam,

kafir

Qalileo  Qaliley isə

fırıldaqçıdı –

yerin  yumru  olduğunu

o tapmayıbdı,

yığışdırın  bu  söhbəti

ayıbdı…

 

…    Bizim

sabirabadlılar

ondan qabaq

bilirdilər –

qarpız yumrudu,

yer  də  qarpız  şəklindədi,

həqiqət budu…

 

 

 

 

 

Bölmə : Ədəbiyyat
KÖŞƏ YAZARLARI
TOP 10