Xəyanətin min üzü var…

77 Baxış

trafikGülnarə Sadiq

 

GİLEYLİYƏM

 

Taleyimin nə suçu var?

Mən bəxtimə gileyliyəm.

Xəyanətin min üzü var,

Mən ürəyə gileyliyəm.

 

Həsrət ağlar harda, yarım?

Hər ümidi yarda, yarım

Zaman doğrar yarım-yarım,

Mən diləyə gileyliyəm.

 

Dünya deyər, gör əzabı,

Sıx, qəlbinə hör əzabı,

Dünya kimi sür əzabı,

Mən kələyə gileyliyəm.

 

 

 

 

BİR GÜN

 

Nə vaxtsa bir gün, şeirin birində,

Hansısa misrada qovuşacağıq.

Sərin kəlmələri düzüb yan – yana,

Elə şeirdəcə yaşayacağıq.

 

Gecə ulduzları – qələm götürüb,

Düzəcək sakitcə vərəq üstünə.

Durmadan yağacaq o ağ yağışlar,

Eşqimin rəsmini sözlər çəkəcək.

 

Heç vaxt dadmadığım göz yaşlarını,

Tökəcək gözümə bu şair indi.

Həsrətdən üşüyən hər ümidimi

Yanan ürəklərə bükəcək indi.

 

Araya suallar gələcək hərdən,

Durmadan döyəcək qəlb qapısını.

Çiçəklər, ləçəklər acıq eyləyib

Didərgin salacaq bal arısını.

 

 

 

GEDİRƏM

 

Gedirəm,

Məni mənə calayan

Qəlbi mənə anlatan ruhumun yüksəkliyinə.

Dünyanın səssizliyinə…

Gedirəm…

Fikrimlə,

düşüncəmlə

məni dünyadan alan –

zülmətin dərinliyinə.

Gedirəm…

ədəbin, ülfətin məkanına,

Eşq üçün,

Vüsal üçün alovlanan könüllərə –

Gedirəm…

 

 

 

 

 

 

Bölmə : Ədəbiyyat
KÖŞƏ YAZARLARI
TOP 10