Azərbaycanlı fotorəssamın işi Madriddə sərgiləndi

Sentyabr ayından dekabradək Madriddə keçirilən “Viran edilmiş torpaqlar” adlı sərgidə Azərbaycan, Əfqanıstan, Əlcəzair, Misir, Birləşmiş Ərəb Əmirlikləri, İran, Mərakeş, Livan və Fələstindən olan 10 qadın rəssamın əl işləri nümayiş etdirilir.

Senet.az xəbər verir ki, Azərbaycanı bu sərgidə tanınmış fotorəssam Rəna Əfəndi təmsil edir.

Sərginin kuratoru qismində məşhur ispaniyalı sənətşünas Pyedad Solans çıxış edir.

P.Solansın sözlərinə görə, sərgidə hərbi əməliyyatların olduğu, terror aktlarının və zorakılığın baş verdiyi ölkələrin landşaftı təqdim olunur.

İspaniyalı sənətşünas hesab edir ki, 10 qadın rəssamın əl işləri zorakılığı və ədalətsizliyi pisləyir, zəif insanların ağrı-acısını və tənhalığını sənədlərlə əsaslandırır.

Rəna Əfəndi “Fifty Crows” Beynəlxalq Sənədli Fotoqrafiya Fondunun keçirdiyi müsabiqənin mükafatçısı, həmçinin Azərbaycanda “İlin fotorəssamı” mükafatının laureatıdır. O, müxtəlif ölkələrdə keçirilən sərgilərdə iştirak edib.

Amerikanın “Photo District News” jurnalı 2007-ci ildə Rəna Əfəndini dünyanın 30 ən tanınmış fotoqraflarının siyahısına daxil edib.