“Hasarın o üzü” tamaşası Gənc Tamaşaçılar Teatrında

Fevralın 19-da Azərbaycan Dövlət Gənc Tamaşaçılar Teatrının cari repertuarında olan “Hasarın o üzü” tamaşası 25-ci dəfə göstəriləcək.

Teatrdan Senet.az-a bildirilib ki, bu səhnə əsəri tanınmış yazıçı-dramaturq, Əməkdar İncəsənət Xadimi Əli Əmirlinin eyniadlı əsəri əsasında hazırlanıb. Tamaşanın quruluşçu rejissoru Əməkdar İncəsənət Xadimi Bəhram Osmanov, quruluşçu rəssamı Əməkdar Rəssam İsmayıl Məmmədov, bəstəkarı Xalq Artisti Səyavuş Kərimidir.

Bir ailə daxilində, dinə ikili münasibətdən bəhs edən kəskin konfliktli, iti süjetli səhnə versiyası olaraq düşünülmüş tamaşada dinə baxış, insan mənəviyyatı, əxlaq prinsipləri, milli mentalitet və cəmiyyətin bu dəyərlərə münasibəti bir ailə çərçivəsində bütün kəskinliyi ilə bədii obrazlar vasitəsilə önə çəkilir.

Tamaşada rolları Xalq artistləri Həmidə Ömərova, Nurəddin Mehdixanlı, gənc və istedadlı aktrisalar Şəbnəm Hüseynova, Günel Məmmədova, Asya Atakişiyeva və Səbinə Məmmədova canlandıracaqlar.