Sənət.az təqdim ediləcək

1 fevral 2015-ci il tarixində, saat 15:00-da  “Kitabevim.az”  kitab marketində yeni təsis edilmiş “Senet.az” elektron dərgisinin təqdimatı keçiriləcək. Bu barədə dərginin baş redaktoru Müşfiq Xan məlumat verib. “Təqdimata bütün ədəbiyyat və mədəniyyət adamlarını, oxucuları dəvət edirik. Ümid edirik ki, dostlarımız və ədəbiyyatsevərlər həmin gün bizi tək qoymayacaq”. Dərginin təsisçisi filologiya üzrə fəlsəfə doktoru, dosent Şəmil Sadiq açıqlamasında bildirib ki, ədəbiyyat və mədəniyyət sahəsində  fəaliyyət göstərəcək “senet.az” dərgisi digər  ədəbiyyat və mədəniyyət saytlarından  ciddi şəkildə fərqlənəcək: “Senet.az elektron dərgisini yaratmaqda məqsədimiz  sənət, söz adamlarının yataq otağını təbliğ və tərənnüm edib milləti kütləyə çevirmək yox, ciddi elmi və ədəbi mətnləri təqdim etməklə milli qürur hissinin, bəşəriliyin, mərifətin təntənəsinə yardım etmək, cəmiyyətimiz  üçün faydalı olmaqdır. Mən içində işıq gəzdirən sağlam komandamızın hər vəchlə buna çalışacağına, düşünən insana dəyərli məlumatları çatdıracağına, düşünən gəncliyi düzgün istiqamətləndirəcəyinə ümid və arzu edirəm. Ulu Cavidin dediyi “Turana qılıncdan daha kəskin, ulu qüvvət, mədəniyyət, mədəniyyət, mədəniyyət” ideyasından yola çıxaraq mərd, qürurlu, heysiyyətli mərifət əhlinin yanında olmaq, gəncliyin bu düşüncədə formalaşmasına cəhd etmək şah damarımızda axan qan kimi bizə yaxın olacaq”. senet.az