Yaqub Mahmudovun “Seçilmiş əsərləri”nin növbəti üç cildi nəşr olundu

Azərbaycan Milli Elmlər Akademiyasının həqiqi üzvü, Əməkdar elm xadimi, Dövlət Mükafatı laureatı Yaqub Mahmudovun “Seçilmiş əsərləri”nin növbəti üç cildi - XVIII-XX cildləri nəşr olunub.

Yeni nəşrlər akademik Yaqub Mahmudovun 85 illik yubileyinə həsr olunub.

“Seçilmiş əsərlər”in XVIII-XX cildlərinə Yaqub Mahmudovun “Azərbaycan xalqının İrəvan və ətrafındakı torpaqlara tarixi varislik hüququ bərpa olunmalıdır” (Azərbaycan, ingilis və rus dillərində), “Saxtakarların yalançı elmi, yaxud ermənisayağı “tarix” (Azərbaycan, ingilis, rus və gürcü dillərində), “Real tarix və “böyük Ermənistan” uydurması” (gürcü, ərəb, ibri və fars dillərində), “Azərbaycan Xalq Cümhuriyyəti (1918-1920): Azərbaycan xalqının tarixinin parlaq səhifəsi” (Azərbaycan və rus dillərində), “1918-1920-ci illərdə Azərbaycanın türk-müsəlman əhalisinə qarşı soyqırımı” (ingilis, rus, polyak və gürcü dillərində), “Səyyahlar Azərbaycana gəlir” (Azərbaycan və ingilis dillərində), “Səyyahlar, kəşflər, Azərbaycan” (ingilis dilində) və “Odlar yurduna səyahət” (ingilis dilində) kitabları daxil edilib.

Cildlərin elmi redaktorları tarixçi alimlər Güntəkin Nəcəfli və Yeganə Gözəlova (Çağlayan), dizayneri riyaziyyat üzrə fəlsəfə doktoru Mehri Xanbabayeva, texniki redaktoru isə Aydan Əliməmmədovadır.